இந்திய தேசிய பாதுகாப்பு ஆலோசகர் (NSA) அஜித் டோவல், வங்கதேச தேசிய பாதுகாப்பு ஆலோசகர் கலீலுர் ரஹ்மானை புது டெல்லியில் சந்தித்தார். கொழும்பு பாதுகாப்பு மாநாடு மற்றும் இருதரப்பு முக்கிய விவகாரங்கள் குறித்து இந்த சந்திப்பில் ஆலோசிக்கப்பட்டது. எனினும், சந்திப்பு குறித்த விரிவான தகவல்கள் வெளியாகவில்லை. வங்கதேசத்தில் பாகிஸ்தானைச் சேர்ந்த பயங்கரவாதக் குழுக்களின் செயல்பாடுகள் அதிகரித்துள்ளதாகக் கூறப்படும் நிலையில், முன்னாள் பிரதமர் ஷேக் ஹசீனாவை நாடு கடத்தக் கோரி டாக்கா விடுத்த வேண்டுகோளுக்கு மத்தியில் இந்த சந்திப்பு முக்கியத்துவம் பெறுகிறது.

வங்கதேசத்தில் லஷ்கர் பயங்கரவாதி சைஃபுல்லா சைஃப் காணொலி வாயிலாகப் பங்கேற்றதாகவும், தடை செய்யப்பட்ட இஸ்லாமிய அமைப்புகளின் தலைவர்கள் சில அரசு அதிகாரிகளுடன் தொடர்பில் இருந்ததாகவும் வெளியான அறிக்கைகளுக்கு மத்தியில் இந்த சந்திப்பு நடைபெற்றது. பாதுகாப்பு தொடர்பான இந்த முக்கியமான விஷயங்கள் குறித்து டோவலுக்கும் ரஹ்மானுக்கும் இடையே குறிப்பிட்ட விவாதம் எதுவும் நடந்ததா என்பது குறித்து எந்த அதிகாரப்பூர்வ அறிவிப்பும் இல்லை. இந்த சந்திப்பின் முடிவில், கலீலுர் ரஹ்மான் டோவலை வங்கதேசத்திற்கு வருகை தருமாறு அழைப்பு விடுத்தார்.