இஸ்ரேல் பிரதமர் பெஞ்சமின் நெதன்யாகு காலமானதாக சமூக வலைதளங்களில் பரவி வரும் தகவல்கள் முற்றிலும் ஆதாரமற்றவை என்று இஸ்ரேல் அரசு விளக்கம் அளித்துள்ளது. பிரதமர் அலுவலகம் வெளியிட்டுள்ள அறிக்கையில், நெதன்யாகு முழு ஆரோக்கியத்துடன் இருப்பதாகவும், திட்டமிட்டே இத்தகைய தவறான செய்திகள் பரப்பப்படுவதாகவும் தெரிவிக்கப்பட்டுள்ளது. மத்திய கிழக்கு போர் பதற்றங்களுக்கு மத்தியில் இந்த வதந்தி பெரும் பரபரப்பை ஏற்படுத்தியுள்ளது.

பிரதமரின் அதிகாரப்பூர்வ எக்ஸ் தளத்தில் வெளியான ஒரு வீடியோவில் காணப்பட்ட ஏஐ குளறுபடிகள் இந்த சந்தேகத்திற்கு வித்திட்டன. வீடியோவில் உள்ள உருவத்தின் விரல்கள் மற்றும் பின்னணி காட்சிகளில் முரண்பாடு இருப்பதாகக் கூறி, அது செயற்கை நுண்ணறிவால் உருவாக்கப்பட்டது என நெட்டிசன்கள் பதிவிட்டனர். இருப்பினும், டிஜிட்டல் தொழில்நுட்ப மாற்றங்களால் இத்தகைய பிழைகள் ஏற்பட வாய்ப்புள்ளதாக நிபுணர்கள் கருதுகின்றனர். தற்போது அரசு தரப்பு விளக்கத்தால் அனைத்து யூகங்களுக்கும் முற்றுப்புள்ளி வைக்கப்பட்டுள்ளது.