கரூர் மாநாட்டில் ஏற்பட்ட கூட்ட நெரிசலில் 41 பேர் உயிரிழந்த சம்பவம் தொடர்பாக, தமிழக வெற்றிக் கழகத் தலைவர் விஜய் இன்று டெல்லியில் உள்ள சிபிஐ தலைமையகத்தில் நேரில் ஆஜரானார். கடந்த ஆண்டு செப்டம்பர் 27-ஆம் தேதி நடந்த இந்த துயர சம்பவம் குறித்து உச்ச நீதிமன்ற உத்தரவின் பேரில் சிபிஐ விசாரணை நடத்தி வருகிறது. முன்னதாக சென்னையில் விசாரணை நடத்த விடுக்கப்பட்ட கோரிக்கையை நிராகரித்த சிபிஐ, அவரை டெல்லிக்கு வரவழைத்துள்ளது.

பாதுகாப்பு ஏற்பாடுகளில் ஏற்பட்ட குளறுபடிகள் மற்றும் அனுமதிக்கப்பட்ட அளவை விட கூடுதல் மக்கள் கூடியது குறித்து விஜய்யிடம் அதிகாரிகள் அடுக்கடுக்கான கேள்விகளை எழுப்ப உள்ளனர். குறிப்பாக, நெரிசல் ஏற்பட்ட பிறகும் உரையைத் தொடர்ந்தது ஏன் என்பது குறித்து தீவிர விசாரணை நடத்தப்படவுள்ளது. சட்டமன்றத் தேர்தல் நெருங்கும் வேளையில் நடக்கும் இந்த விசாரணை தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.