ஜார்ஜியாவில் 56 இந்திய சுற்றுலாப் பயணிகள் மோசமான முறையில் நடத்தப்பட்டதாகக் கூறப்படுகிறது. ஒரு இந்தியப் பெண்மணி தனது சமூக ஊடகப் பக்கத்தில், ஆர்மீனியாவிலிருந்து ஜார்ஜியாவிற்குள் நுழைய முயன்றபோது, அவர்கள் சதாஃக்லோ எல்லையில் பல மணி நேரம் தடுத்து வைக்கப்பட்டதாகக் குற்றம் சாட்டினார். செல்லுபடியாகும் இ-விசா மற்றும் ஆவணங்கள் இருந்தபோதிலும், உறைபனி குளிரில் உணவு, கழிப்பறை வசதியின்றி 5 மணி நேரத்திற்கும் மேலாக காத்திருக்க வேண்டியிருந்தது.

அந்தப் பெண் தனது பதிவில் பிரதமர் நரேந்திர மோடி மற்றும் வெளியுறவுத் துறை அமைச்சர் டாக்டர் எஸ். ஜெய்சங்கர் ஆகியோரை டேக் செய்து, இந்த சம்பவத்தில் கடுமையான நடவடிக்கை எடுக்கக் கோரினார். ஜார்ஜியாவில் இந்தியர்கள் நடத்தப்படும் விதம் “அவமானம் மற்றும் ஏற்றுக்கொள்ள முடியாதது” என்று அவர் கூறினார். இவரின் இடுகைக்குப் பிறகு, பல பயனர்கள் ஜார்ஜியாவில் இந்திய சுற்றுலாப் பயணிகள் எதிர்கொண்ட இதுபோன்ற மோசமான அனுபவங்களை பகிர்ந்துள்ளனர், இது அந்நாட்டில் இந்தியர்களுக்கு எதிரான பாரபட்சமான நடத்தையை வெளிப்படுத்துகிறது.