தமிழகத்தில் நிலவும் சமையல் எரிவாயு தட்டுப்பாடு மற்றும் மத்திய அரசின் வெளியுறவுக் கொள்கைகளைக் கண்டித்து திமுக தலைமையிலான கூட்டணி கட்சிகள் இன்று மாநிலம் தழுவிய போராட்டத்தை நடத்துகின்றன. போர் பதற்றத்தால் கச்சா எண்ணெய் வரத்து பாதிக்கப்பட்டுள்ள நிலையில், சிலிண்டர் கிடைக்காமல் பொதுமக்கள் தவிக்கும் சூழல் உருவாகியுள்ளது. இது தொடர்பாக முதலமைச்சர் மு.க. ஸ்டாலின் கடிதம் எழுதியும் மத்திய அரசு நடவடிக்கை எடுக்கவில்லை எனக்கூறி இந்த ஆர்ப்பாட்டம் முன்னெடுக்கப்படுகிறது.

இன்று காலை 10:30 மணியளவில் அனைத்து மாவட்டத் தலைநகரங்களிலும் நடைபெறும் இந்தப் போராட்டத்தில் கூட்டணி கட்சித் தலைவர்கள் பங்கேற்கின்றனர். நிதி ஒதுக்கீடு மற்றும் மெட்ரோ ரயில் திட்ட விவகாரங்களில் மத்திய அரசின் போக்கையும் கண்டித்து முழக்கங்கள் எழுப்பப்படுகின்றன. அதேவேளையில், பொதுமக்களிடையே பீதியை ஏற்படுத்தவே திமுக இந்த போராட்டத்தை நடத்துவதாக பாஜக விமர்சித்துள்ளது. தேர்தல் நெருங்கும் வேளையில் இந்த விவகாரம் தமிழக அரசியலில் பெரும் பரபரப்பை ஏற்படுத்தியுள்ளது.