கேரளாவில் நடைபெறவுள்ள சட்டசபைத் தேர்தலில் ஆளும் இடதுசாரி ஜனநாயக முன்னணி (LDF) மற்றும் காங்கிரஸ் தலைமையிலான ஐக்கிய ஜனநாயக முன்னணி (UDF) இடையே மிகக் கடுமையான போட்டி நிலவும் என மேட்ரிஸ்-ஐஏஎன்எஸ் கருத்துக் கணிப்பு தெரிவித்துள்ளது. மொத்தமுள்ள 140 தொகுதிகளில் ஆட்சியைப் பிடிக்க 71 இடங்கள் தேவை என்ற நிலையில், இடதுசாரிகள் 61 முதல் 71 இடங்களையும், காங்கிரஸ் கூட்டணி 58 முதல் 69 இடங்களையும் கைப்பற்ற வாய்ப்புள்ளதாகத் தெரிகிறது.

கடந்த தேர்தலில் இடதுசாரிகள் 99 இடங்களில் வென்று வலுவான ஆட்சியை அமைத்திருந்தாலும், இந்த முறை அரசுக்கு எதிரான அதிருப்தி அதிகரித்துள்ளதால் போட்டி தீவிரமடைந்துள்ளது. வாக்கு சதவீதத்தைப் பொறுத்தவரை இரு கூட்டணிகளுக்கும் இடையே வெறும் 1 சதவீத இடைவெளியே உள்ளது. பாஜக தலைமையிலான என்டிஏ கூட்டணி 2 இடங்களைப் பெறக்கூடும் எனக் கணிக்கப்பட்டுள்ளது. கேரளாவில் ஏப்ரல் 9ஆம் தேதி தேர்தல் நடைபெற்று, மே 4ஆம் தேதி முடிவுகள் அறிவிக்கப்பட உள்ளன.