டி20 உலகக் கோப்பையில் இந்திய அணி வரலாற்றுச் சாதனை படைத்துள்ள வேளையில், நட்சத்திர வீரர் ரிங்கு சிங்கின் பதிவு அனைவரையும் நெகிழச் செய்துள்ளது. உலகக் கோப்பைத் தொடரின் போதே கல்லீரல் புற்றுநோயால் தனது தந்தையை இழந்த ரிங்கு சிங், அந்தத் துயரத்தையும் தாண்டி நாட்டின் கடமையே முக்கியம் என விளையாடினார். தற்போது சாம்பியன் பட்டம் வென்ற பிறகு, தனது தந்தைக்கு அவர் எழுதிய உருக்கமான கடிதம் சமூக வலைதளங்களில் வைரலாகி கோடிக்கணக்கான ரசிகர்களைக் கண்கலங்க வைத்துள்ளது.

தந்தை கற்றுக்கொடுத்த பாதையில் தனிப்பட்ட சோகத்தை ஒதுக்கி வைத்துவிட்டு களத்தில் போராடியதாக ரிங்கு சிங் குறிப்பிட்டுள்ளார். கனவு நிறைவேறிய இந்தத் தருணத்தில் தந்தை அருகில் இல்லையே என்ற அவரது ஏக்கம் பதிவில் வெளிப்பட்டது. ரிங்கு சிங்கின் இந்த மன உறுதியை அவரது நிச்சயதார்த்தம் செய்யப்பட்ட பிரியா சரோஜும் பாராட்டியுள்ளார். வெற்றிக் களிப்பிற்கு மத்தியிலும் தந்தையின் கனவுக்காக ஒரு மகன் நடத்திய இந்தப் போராட்டம் இந்திய கிரிக்கெட் வரலாற்றில் என்றும் நீங்காத இடம்பிடிக்கும் என்பதில் ஐயமில்லை.