ரஷ்யா-உக்ரைன் போர் மூன்று ஆண்டுகளுக்கும் மேலாக நடைபெற்று வருகிறது. இந்தப் போரின்போது, உக்ரைன் ரஷ்யா மீது பெரிய அளவிலான டிரோன் தாக்குதலை நடத்தியது. இதில் ரஷ்ய விமானத் தளங்கள் குறிவைத்து 41 விமானங்கள் அழிக்கப்பட்டன.

‘ஆபரேஷன் ஸ்பைடர் வெப்’ திட்டத்தின் கீழ் உக்ரைன் இந்த தாக்குதலை நடத்தியது. இந்தத் தாக்குதலின் போது ரஷ்யா உக்ரைனின் 162 ட்ரோன்களை சுட்டு வீழ்த்தியுள்ளதாக தற்போது தகவல் வெளியாகியுள்ளது.

இந்தத் தாக்குதல் நடந்த ஒரு நாள் கழித்து, உக்ரைனின் 162க்கும் மேற்பட்ட ட்ரோன்கள் சுட்டு வீழ்த்தப்பட்டதை ரஷ்ய பாதுகாப்பு அமைச்சகம் உறுதிப்படுத்தியது. உக்ரைன் ரஷ்யாவின் பல நகரங்களையும் தொழில்துறை நிறுவனங்களையும் குறிவைத்து இந்த தாக்குதலை நடத்தியது.

மாஸ்கோ நேரப்படி ஜூன் 1 இரவு 8:10 மணி முதல் ஜூன் 2 அதிகாலை 2 மணி வரை, ரஷ்யாவின் வான் பாதுகாப்பு அமைப்புகள் இந்த ட்ரோன்களை வானிலேயே இடைமறித்து 162க்கும் மேற்பட்ட ட்ரோன்களை சுட்டு வீழ்த்தின.

அறிக்கையின்படி, ரஷ்யாவின் குர்ஸ்க் பகுதியில் உக்ரைனின் 57 ஆளில்லா வான்வழி வாகனங்கள் (யுஏவி), பெல்கோரோட் பகுதியில் 31 யுஏவிகள், லிபெட்ஸ்கில் 27 யுஏவிகள், வோரோனெஜில் 16 யுஏவிகள், பிரையன்ஸ்கில் 11 யுஏவிகள், ரியாசனில் 11 யுஏவிகள், ஓரியோலில் 6 யுஏவிகள், கிரிமியா குடியரசில் இரண்டு யுஏவிகள் மற்றும் டம்போவ்வில் ஒரு யுஏவி ஆகியவை சுட்டு வீழ்த்தப்பட்டுள்ளன.

முன்னதாக, உக்ரைன் நடத்திய டிரோன் தாக்குதலில் நாடு முழுவதும் ஐந்து இராணுவ விமானத் தளங்கள் குறிவைக்கப்பட்டதாகவும், இதன் விளைவாக பல விமானங்கள் சேதமடைந்ததாகவும் ரஷ்யா உறுதிப்படுத்தியது. இருப்பினும், எத்தனை விமானங்கள் சேதமடைந்தன என்பது குறித்த சரியான எண்ணிக்கை வெளியிடப்படவில்லை.

ரஷ்யா மற்றும் உக்ரைன் இடையே தற்போதுள்ள பதட்டங்களுக்கு மத்தியில், அடுத்த சுற்று அமைதிப் பேச்சுவார்த்தைக்காக உக்ரைன் பிரதிநிதிகள் குழு இஸ்தான்புல் சென்றடைந்துள்ளது. இந்த அமைதிப் பேச்சுவார்த்தை ஜூன் 2 அன்று மதியம் நடைபெறும்.