மேற்கு ஆசியாவில் நிலவும் பதற்றத்தால் ஏற்பட்டுள்ள எரிவாயு தட்டுப்பாட்டைப் போக்க, வணிக ரீதியான எல்பிஜி சிலிண்டர் ஒதுக்கீட்டை மத்திய அரசு அதிரடியாக அதிகரித்துள்ளது. இரும்பு, ஜவுளி மற்றும் வாகன உற்பத்தி போன்ற முக்கியத் தொழில்துறைகளில் உற்பத்தி பாதிக்கப்பட்டுள்ள நிலையில், இந்த கூடுதல் விநியோகத்திற்கு முன்னுரிமை அளிக்கப்பட்டுள்ளது. அரசின் இந்த புதிய முடிவின் மூலம் தொழிற்சாலைகளுக்குக் கூடுதல் எரிவாயு கிடைக்க வழிவகை செய்யப்பட்டுள்ளது.

இந்தச் சலுகையைப் பெற நிறுவனங்கள் எண்ணெய் சந்தைப்படுத்தல் நிறுவனங்களில் பதிவு செய்து, பிஎன்ஜி இணைப்பிற்கு விண்ணப்பிக்க வேண்டும் என நிபந்தனை விதிக்கப்பட்டுள்ளது. முன்னதாக உணவகங்கள் மற்றும் புலம்பெயர்ந்த தொழிலாளர்களுக்காகச் சிறப்பு ஒதுக்கீடுகள் செய்யப்பட்டிருந்தன. ஹார்முஸ் ஜலசந்தியில் கப்பல் போக்குவரத்தில் ஏற்பட்டுள்ள தடையைச் சமாளிக்க இந்தியா தற்போது தூதரக ரீதியான பேச்சுவார்த்தைகளையும் முன்னெடுத்து வருகிறது. உலகளாவிய சந்தை நிலவரங்களுக்கு மத்தியில் இந்த நடவடிக்கை எந்தளவுக்குக் கைகொடுக்கும் என்பதைப் பொறுத்திருந்துதான் பார்க்க வேண்டும்.