ஈரானின் தலைநகர் தெஹ்ரான், சிராஸ் மற்றும் அஹ்வாஸ் ஆகிய நகரங்களில் உள்ள ராணுவ தளங்களை குறிவைத்து இஸ்ரேல் வெள்ளிக்கிழமை காலை பயங்கர வான்வழித் தாக்குதலை நடத்தியுள்ளது. ஏவுகணை தயாரிப்பு ஆலைகள் மற்றும் நிலத்தடி பதுங்கு குழிகளை அழிப்பதே இந்தத் தாக்குதலின் நோக்கம் என இஸ்ரேல் தெரிவித்துள்ளது. தெஹ்ரான் பல்கலைக்கழகம் அருகே நடந்த குண்டுவெடிப்பு மற்றும் பல்வேறு ராணுவ நிலைகளில் ஏற்பட்ட வெடிப்புகளால் மத்திய கிழக்கில் போர் பதற்றம் அதிகரித்துள்ளது.

இந்த இக்கட்டான சூழ்நிலையில், ஈரானிய வெளியுறவுத் துறை அமைச்சர் செய்யது அப்பாஸ் அராக்சி இந்திய வெளியுறவுத் துறை அமைச்சர் எஸ். ஜெய்சங்கரை தொலைபேசியில் தொடர்பு கொண்டார். அப்போது இஸ்ரேலின் ஆக்கிரமிப்பு குறித்து கவலை தெரிவித்த அவர், இந்தியாவின் ராஜதந்திர தலையீட்டை கோரினார். தனது நாட்டை தற்காத்துக் கொள்ள ஈரானுக்கு முழு உரிமை உண்டு என்றும், சர்வதேச பாதுகாப்பிற்கு இது அச்சுறுத்தல் என்றும் அவர் ஜெய்சங்கரிடம் வலியுறுத்தினார்.