மணிரத்னம் இயக்கத்தில் உருவாகி வரும் பிரம்மாண்ட திரைப்படமான “தக் லைஃப்” படத்தின் முன்னோட்டம் சமீபத்தில் வெளியாகி இளைஞர்கள் மத்தியில் பெரும் வரவேற்பைப் பெற்றுள்ளது. காதல், செண்டிமெண்ட், மற்றும் அதிரடியான சண்டைக்காட்சிகள் என அனைத்தும் கலந்த ஒரு கமர்ஷியல் விருந்தாக இந்த ட்ரெய்லர் அமைந்துள்ளது. குறிப்பாக, உலகநாயகன் கமல்ஹாசன் மற்றும் சிலம்பரசன் TR ஆகியோர் இணைந்து நடிக்கும் காட்சிகள் ரசிகர்களின் ஆர்வத்தை மேலும் தூண்டியுள்ளது. மணிரத்னம் ஒவ்வொரு காட்சியையும் மிகவும் நுணுக்கமாக செதுக்கியிருப்பது ட்ரெய்லரைப் பார்க்கும்போதே தெரிகிறது.

வெளியான குறுகிய காலத்திலேயே “தக் லைஃப்” ட்ரெய்லர் புதிய சாதனைகளை படைத்து வருகிறது. வெறும் பதினாறு மணி நேரத்தில் தமிழ், தெலுங்கு, மற்றும் மலையாளம் ஆகிய மூன்று மொழிகளிலும் சேர்த்து 17 மில்லியன் பார்வைகளை கடந்துள்ளது. கமல்ஹாசன் அவர்களின் திரைப்பட முன்னோட்டங்களிலேயே மிகக் குறைந்த நேரத்தில் இவ்வளவு அதிகமான பார்வைகளை பெற்றது இதுவே முதல் முறையாகும். இந்த ட்ரெய்லர் படத்தின் மீதான எதிர்பார்ப்பை மேலும் அதிகரித்துள்ளது என்பதில் சந்தேகமில்லை. படத்தின் வெளியீட்டிற்காக ரசிகர்கள் ஆவலுடன் காத்திருக்கின்றனர்.