ஆசிய கோப்பை 2025-இன் சூப்பர் 4 சுற்றில் இந்தியா மற்றும் பாகிஸ்தான் அணிகள் செப்டம்பர் 21 அன்று துபாயில் மீண்டும் மோதுகின்றன. இந்த முக்கியமான போட்டிக்கு முன்னதாக ஒரு புதிய சர்ச்சை எழுந்துள்ளது. முந்தைய போட்டியில் இந்திய கேப்டன் சூர்யகுமார் யாதவ் பாகிஸ்தான் வீரர் சல்மான் அலி ஆகாவுடன் கைகுலுக்க மறுத்ததை அடுத்து, பாகிஸ்தான் கிரிக்கெட் வாரியம் (பிசிபி) போட்டி நடுவர் ஆண்டி பைக்கிராஃப்ட்டை நீக்க ஐசிசியிடம் கோரிக்கை விடுத்திருந்தது. எனினும், ஐசிசி அந்தக் கோரிக்கையை நிராகரித்ததுடன், இந்தியா-பாகிஸ்தான் சூப்பர் 4 போட்டிக்கும் அவரையே நடுவராக மீண்டும் நியமித்துள்ளது.

ஐசிசியின் இந்த முடிவால் அதிருப்தியடைந்த பிசிபி, போட்டியில் இருந்து விலகுவதாக அச்சுறுத்தியுள்ளது. இந்த நிலையில், லாகூரில் பிசிபி அதிகாரிகளின் அவசர கூட்டம் நடைபெற்றது. அதேநேரம், ஐசிசி தனது முடிவில் உறுதியாக உள்ளதுடன், பிசிபிக்கு எதிராக ஒழுங்கு நடவடிக்கை எடுப்பதையும் பரிசீலித்து வருகிறது. தொடர்ந்து விதிகளை மீறியும், தேவையற்ற சர்ச்சைகளை உருவாக்கியும் வருவதால், பிசிபி மீது கடுமையான நடவடிக்கை எடுக்கப்படலாம் என ஐசிசி கருதுகிறது. வரவிருக்கும் இந்தியா-பாகிஸ்தான் போட்டியில் களத்தின் சூழலை சிறப்பாக பராமரிப்பதில் கூடுதல் கவனம் செலுத்தப்படும்.