மேற்கு வங்க மாநிலம் அலிபுர்துவாரில் ஆட்டோவில் சக பயணியின் பணத்தைத் திருடிய புகாரில், குழந்தையுடன் இருந்த பீகாரைச் சேர்ந்த இரண்டு பெண்களைப் போலீஸார் கைது செய்துள்ளனர்.

சம்பவம் என்ன?

சல்சலாபாரி பகுதியைச் சேர்ந்த மகாமாயா தாஸ் என்பவர், நேற்று காலை 11 மணியளவில் நீதிமன்றப் பணிக்காக ஆட்டோவில் சென்று கொண்டிருந்தார். அவர் சென்ற ஆட்டோவில் குழந்தையுடன் இரண்டு பெண்கள் ஏறியுள்ளனர்.

பணம் மாயம்

நீதிமன்றம் அருகே இறங்கிய மகாமாயா, தனது பையிலிருந்த 7,000 ரூபாய் திருடு போயிருப்பதைக் கண்டு அதிர்ச்சியடைந்தார். உடனே மற்றொரு ஆட்டோவில் ஏறி, தான் பயணம் செய்த அந்தப் பழைய ஆட்டோவைப் பின்தொடர்ந்து விரட்டிச் சென்றார்.

சிக்கிய திருடர்கள்

அலிபுர்துவார் சந்திப்பு பகுதியில் அந்த ஆட்டோவை மடக்கிய அவர், சந்தேகத்திற்குரிய அந்த இரண்டு பெண்களையும் தடுத்து நிறுத்திக் கேள்வி எழுப்பினார். அப்போது பிடிபடுவோம் என்ற பயத்தில் அவர்கள் பணத்தை கீழே வீசியதாகக் கூறப்படுகிறது.

தகவலறிந்து சம்பவ இடத்திற்கு வந்த அலிபுர்துவார் ஜங்ஷன் அவுட்போஸ்ட் போலீஸார், அந்த இரு பெண்களையும் கைது செய்து விசாரணை நடத்தி வருகின்றனர். அவர்களுடன் இருந்த குழந்தை குறித்தும் சட்டப்பூர்வ நடவடிக்கைகள் மேற்கொள்ளப்பட்டு வருகின்றன.

இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.