நீண்ட இடைவேளைக்குப் பிறகு நடிகை அனுஷ்கா சர்மா மீண்டும் திரையில் தோன்றவுள்ளார். இயக்குனர் அட்லீயின் அடுத்த பிரம்மாண்ட படைப்பில் தென்னிந்திய சூப்பர் ஸ்டார் அல்லு அர்ஜுனுடன் அவர் இணையவுள்ளதாகத் தகவல்கள் வெளியாகியுள்ளன. இது ஒரு அறிவியல் புனைகதை திரைப்படமாகும், இதன் மூலம் அனுஷ்கா தெலுங்கு திரையுலகில் கால் பதிக்க உள்ளார். இப்படத்தில் தீபிகா படுகோன் மற்றும் ராஷ்மிகா மந்தனா ஆகியோரும் முக்கிய வேடங்களில் நடிக்கவுள்ளதால் ரசிகர்கள் பெரும் எதிர்பார்ப்பில் உள்ளனர்.

கடந்த சில ஆண்டுகளாக லண்டனில் வசித்து வரும் அனுஷ்கா, இப்படத்தின் மூலம் ஒரு அதிரடி மாற்றத்தை ஏற்படுத்துவார் என்று எதிர்பார்க்கப்படுகிறது. ‘ஜவான்’ வெற்றிக்குப் பிறகு அட்லீ இயக்கும் இப்படத்திற்கு சாய் அபயங்கர் இசையமைக்கிறார். அதிகாரப்பூர்வ அறிவிப்பு இன்னும் வெளியாகாத நிலையில், ஏப்ரல் 8-ஆம் தேதி அட்லீயின் பிறந்தநாளை முன்னிட்டு படத்தின் டீசர் வெளியாகும் எனத் தெரிகிறது. அல்லு அர்ஜுன் – அனுஷ்கா சர்மா கூட்டணியைக் காண இந்தியத் திரையுலகமே ஆவலுடன் காத்திருக்கிறது.