புதுச்சேரி சட்டப்பேரவைத் தேர்தலில் போட்டியிடும் வேட்பாளர்களை இறுதி செய்வதற்காக பாஜகவின் முக்கிய தலைவர்கள் மூவர் நாளை டெல்லி செல்கின்றனர். கட்சி மேலிடத்தின் அழைப்பின் பேரில் மாநிலத் தலைவர் வி.பி. ராமலிங்கம், சட்டப்பேரவைத் தலைவர் செல்வம் மற்றும் உள்துறை அமைச்சர் நமச்சிவாயம் ஆகியோர் இந்த பயணத்தை மேற்கொள்கின்றனர். கூட்டணியில் பாஜக மற்றும் அதன் தோழமைக் கட்சிகளுக்கு 14 தொகுதிகள் ஒதுக்கப்பட்டுள்ள நிலையில், ஒவ்வொரு தொகுதிக்கும் தலா மூன்று பெயர்கள் பரிந்துரைக்கப்பட்டுள்ளன.

இதற்கிடையில் டெல்லி தலைமை வேட்பாளர் பட்டியலை முறைப்படி அறிவிக்கும் என்று ராமலிங்கம் செய்தியாளர்களிடம் தெரிவித்தார். தேர்தல் பிரச்சாரத்திற்காக பிரதமர் நரேந்திர மோடி மற்றும் உள்துறை அமைச்சர் அமித் ஷா ஆகியோர் புதுச்சேரிக்கு வருகை தர உள்ளனர். கட்சியின் தேர்தல் அறிக்கை இன்னும் இரண்டு நாட்களில் தயாராகிவிடும் என்றும், கூட்டணியில் உள்ள மற்ற கட்சிகளுக்கான தொகுதி ஒதுக்கீடு குறித்து தலைமை விரைவில் முடிவு செய்யும் என்றும் அவர் மேலும் குறிப்பிட்டார்.