நடுத்தர வயதுப் பெண்களிடையே விவாகரத்து விகிதம் அதிகரிப்பதற்குப் பின்னால், ‘மெனோ-விவாகரத்து’ (Meno-Divorce) எனப்படும் புதிய போக்கு வெளிப்பட்டுள்ளது. சமீபத்திய ஆய்வின்படி, 45 முதல் 65 வயதுக்குட்பட்ட பெண்களில் மூன்றில் ஒரு பகுதியினர் இந்தக் காலகட்டத்தில் தங்கள் திருமணத்தை முறித்துக் கொள்ளத் தயாராக இருந்ததாகவும், இந்த முடிவுக்குப் பிறகு அவர்கள் முன்னெப்போதும் இல்லாத மகிழ்ச்சியை உணர்ந்ததாகவும் தெரிய வந்துள்ளது. இங்கிலாந்தில் 2,000க்கும் மேற்பட்ட பெண்களிடம் நடத்தப்பட்ட இந்த ஆய்வில், 46 சதவீத வழக்குகளில் விவாகரத்து முடிவை பெண்களே எடுத்ததாகவும் குறிப்பிடப்பட்டுள்ளது.

25 முதல் 50 ஆண்டுகள் வரையிலான திருமண வாழ்வில் பெண்கள் மன, சமூக மற்றும் ஹார்மோன் ரீதியான அழுத்தங்களை எதிர்கொள்கிறார்கள் என்று ஆய்வாளர்கள் கூறுகின்றனர். மாதவிடாய் நிற்கும் காலத்தில் ஏற்படும் எரிச்சல், தூக்கமின்மை மற்றும் குறைந்த சகிப்புத்தன்மை போன்ற அறிகுறிகள் திருமண உறவில் விரிசலை ஏற்படுத்தலாம். மாதவிடாய் நின்றுபோதலை நேரடியான காரணமாகச் சொல்ல முடியாவிட்டாலும், இந்தக் காலகட்டம் விவாகரத்துக்கான செயல்முறையைத் துரிதப்படுத்துகிறது என்று ஆய்வுகள் தெரிவிக்கின்றன.