மூத்த இயக்குனர் பாரதிராஜாவின் மகனும் நடிகருமான மனோஜ், நேற்று இரவு ஏற்பட்ட மாரடைப்பு காரணமாக காலமானார். அவரது திடீர் மறைவு திரையுலகத்தையே சோகத்தில் ஆழ்த்தியுள்ளது. மனோஜின் மறைவுக்கு பலரும் தங்களது இரங்கல்களை தெரிவித்து வருகின்றனர்.

பாரதிராஜாவின் நெருங்கிய நண்பரான கவிஞர் வைரமுத்து, மனோஜின் மறைவு குறித்து உணர்ச்சிபூர்வமாகப் பதிவிட்டுள்ளார். “மகனே மனோஜ்! மறைந்து விட்டாயா? பாரதிராஜாவின் பாதி உயிரே! பாதிப் பருவத்தில் பறந்து விட்டாயா?” என்று தொடங்கும் வைரமுத்துவின் வரிகள், மனோஜின் மறைவு அவருக்கு ஏற்படுத்திய வேதனையை வெளிப்படுத்துகின்றன.

“‘சிங்கம் பெத்த பிள்ளையின்னு தெரியவப்போம் வாடா வாடா’ என்று உனக்கு அறிமுகப் பாடல் எழுதினேனே; சிங்கம் இருக்கப் பிள்ளை நீ போய்விட்டாயா?” என்ற வரிகள், மனோஜ் மீது வைத்திருந்த அவரது பாசத்தையும் பாரதிராஜாவின் துயரத்தையும் உணர்த்துகின்றன. “முதுமை வயதை பார்த்து வருகிறது; மரணம் வயதை பார்த்து வருவதில்லை” என்ற வார்த்தைகள், எதிர்பாராத இழப்பின் வேதனையை உணர்த்துகின்றன.

மனோஜின் மறைவு திரையுலகத்தினரிடையே ஆழ்ந்த கவலையை ஏற்படுத்தியிருக்கிறது. அவரது ஆத்மா அமைதியில் உறங்க வேண்டும் என்று திரையுலகினர் அனைவரும் பிரார்த்தனை செய்து வருகின்றனர்.