உத்தரப்பிரதேச மாநிலம் காஸ்கஞ்சில் நடந்த திருமண விழாவில் டிஜே இசை நிறுத்திய விவகாரத்தில், மாப்பிள்ளையின் மைத்துனன் ஆத்திரமடைந்து தனது காரை உறவினர்கள் மீது ஏற்றிவிட்டு கோரமாக கொலை செய்துள்ளான். அதிகாலை 3 மணியளவில் நடந்த இந்த கொடூர சம்பவத்தில் மூன்று பேர் சம்பவ இடத்திலேயே பலியாகினர். மேலும், இருவர் படுகாயமடைந்துள்ளனர். இறந்தவர்களில் மணமகனின் இரண்டு பெரியப்பாக்கள் மற்றும் ஒரு மாமா ஆகியோர் அடங்குவர். ஆரம்பத்தில் ஏற்பட்ட வாக்குவாதமும் கைகலப்புமே இந்த கொடூர சம்பவத்திற்கு வழிவகுத்தது.

இந்த கொடூர சம்பவம் சிசிடிவி கேமராவில் பதிவாகியுள்ளது. அதில், குற்றம் சாட்டப்பட்ட கௌஷல் யாதவ் காரை மீண்டும் மீண்டும் மக்கள் கூட்டத்தின் மீது ஏற்றி கொலை செய்தது தெரியவந்துள்ளது. சம்பவத்திற்குப் பிறகு, கௌஷல் தனது தந்தையுடன் அங்கிருந்து தப்பிச் சென்றான். போலீசார் உடனடியாக கொலை வழக்கு பதிவு செய்து, குற்றவாளிகளை பிடிக்க பல குழுக்களை அமைத்து தீவிரமாக தேடி வருகின்றனர். இச்சம்பவம் அந்த திருமண மண்டபம் முழுவதும் பெரும் சோகத்தை ஏற்படுத்தியுள்ளது.