சமீபத்தில் ஓவலில் இங்கிலாந்துக்கு எதிரான டெஸ்ட் வெற்றியைத் தொடர்ந்து, இந்திய வேகப்பந்து வீச்சாளர் முகமது சிராஜ் ‘ஆட்ட நாயகன்’ விருதை வென்றார். ஆட்டத்தின் சிறந்த வீரராக அவருக்கு கோப்பையுடன் ஷாம்பெயின் பாட்டில் பரிசாக வழங்கப்பட்டது. இருப்பினும், தனது மத நம்பிக்கைகள் காரணமாக ஷாம்பெயின் பாட்டிலை ஏற்க சிராஜ் மறுத்துவிட்டார்.

சிராஜுக்கு வழங்கப்பட்ட ஷாம்பெயின், இங்கிலாந்தின் புகழ்பெற்ற ‘சேப்பல் டவுன்’ பிராண்ட் எனத் தெரிவிக்கப்பட்டுள்ளது. இந்த ஷாம்பெயின் இந்தியாவில் கிடைப்பதில்லை, இதன் விலை ₹15,425 முதல் தொடங்குகிறது. இஸ்லாம் மதத்தில் மது அருந்துவது தடை செய்யப்பட்டுள்ளதால், சிராஜ் அந்த பரிசை திருப்பி அளித்தார். ஷாம்பெயின் கொண்டாட்டங்களிலிருந்து முஸ்லிம் வீரர்கள் விலகி இருப்பது இது முதல் முறையல்ல. இதற்கு முன்பும் பல சந்தர்ப்பங்களில் இது போன்ற நிகழ்வுகள் நடந்துள்ளன.