இந்தியா-பாகிஸ்தான் போட்டிக்குப் பிறகு, இரு அணி வீரர்களுக்கு இடையேயான கைக்குலுக்கல் சர்ச்சை விஸ்வரூபம் எடுத்துள்ளது. இந்த விவகாரத்தில் இந்திய அணிக்கு ஆதரவாக களமிறங்கியுள்ள பிசிசிஐ, பாகிஸ்தான் கிரிக்கெட் வாரியத்திற்கு (பிசிபி) தக்க பதிலடி கொடுத்துள்ளது. ஒரு செய்தி நிறுவனத்திடம் பேசிய பிசிசிஐயின் மூத்த அதிகாரி ஒருவர், எதிரணி வீரர்களுடன் கைகுலுக்குவது கட்டாயம் என கிரிக்கெட் விதிகளில் எங்கும் குறிப்பிடப்படவில்லை என்றும், இது வெறும் மரியாதை மட்டுமே என்றும் தெரிவித்துள்ளார்.

பிசிபியின் குற்றச்சாட்டுகள் எதுவாக இருந்தாலும், விதியை மீறியதற்காக ஐசிசி அல்லது ஏசிசி இந்தியாவைத் தண்டிக்க முடியாது என்பதையும் அவர் தெளிவுபடுத்தியுள்ளார். இதற்கிடையில், இந்திய அணியின் கேப்டன் சூர்யகுமார் யாதவ், கைகுலுக்க வேண்டாம் என்ற முடிவு ஒட்டுமொத்த அணியின் முடிவு என்றும், சில விஷயங்கள் விளையாட்டு உணர்வை விட மேலானவை என்றும் கூறியுள்ளார். இந்த சர்ச்சை மேலும் நீடிக்கும் என எதிர்பார்க்கப்படுகிறது.