ஒரு சுற்றுலாத் தலத்தில் ஏற்பட்ட விபத்தில் இருந்து ஒரு தம்பதியினரும் அவர்களது இரு குழந்தைகளும் அதிர்ஷ்டவசமாக உயிர் தப்பினர். சமூக ஊடகங்களில் வைரலான வீடியோவில், டிக்கெட் பரிசோதனைக்குப் பிறகு ஒரு குடும்பம் கேபிள் காரில் ஏறுவதற்காகக் காத்திருப்பதைக் காட்டுகிறது. அப்போது, ​​திடீரென இயந்திர கோளாறு ஏற்பட்டு கேபிள் காரின் ஒரு பகுதி உடைந்து விழுந்தது. அந்த நேரத்தில், அங்கிருந்த ஊழியர் ஒருவர் ஒரு நொடியில் அவர்களைத் தனது பக்கம் இழுத்ததால், ஒரு பெரும் விபத்தில் இருந்து அந்தக் குடும்பம் உயிர் தப்பியது.

இந்த திகிலூட்டும் சம்பவம் பலருக்கு ஹாலிவுட் திரைப்படமான ‘ஃபைனல் டெஸ்டினேஷன்’-ஐ நினைவுபடுத்தியுள்ளது. X (முன்னர் ட்விட்டர்) தளத்தில் பகிரப்பட்ட 29 வினாடி கொண்ட இந்த வீடியோ, லட்சக்கணக்கான மக்களால் பார்க்கப்பட்டு வேகமாகப் பரவி வருகிறது. இந்த வீடியோவைப் பார்த்த பயனர்கள், அந்தக் குடும்பத்தின் உயிரைக் காப்பாற்றிய ஊழியரின் உடனடி நடவடிக்கையையும் துணிச்சலையும் பாராட்டி வருகின்றனர்.