ஆப்கானிஸ்தான் எல்லைக்குள் புகுந்து பாகிஸ்தான் ராணுவம் நடத்திய வான்வழித் தாக்குதலால் இரு நாடுகளுக்கு இடையே போர் பதற்றம் அதிகரித்துள்ளது. புனித ரமலான் மாதத்தின் கடைசி நாட்களில் காபூல், கந்தகார் உள்ளிட்ட பகுதிகளில் நடத்தப்பட்ட இந்த குண்டுவீச்சில் பெண்கள், குழந்தைகள் உட்பட அப்பாவி பொதுமக்கள் உயிரிழந்துள்ளனர். இந்தச் செயலை மனிதாபிமானமற்ற அத்துமீறல் என தாலிபான் அரசு கடுமையாகக் கண்டித்துள்ளது.

பாகிஸ்தானின் இந்த ஆக்கிரமிப்பு நடவடிக்கைக்கு தகுந்த பதிலடி கொடுக்கப்படும் என தாலிபான் தலைமை எச்சரித்துள்ளது. ஏற்கனவே எல்லை மோதல்கள் தீவிரமடைந்துள்ள நிலையில், நாட்டின் ஒரு அங்குல நிலத்தைக் கூட விட்டுக்கொடுக்க மாட்டோம் என ஆப்கான் எல்லைப் படை உறுதிபடத் தெரிவித்துள்ளது. இந்தத் தாக்குதல் சம்பவத்தைத் தொடர்ந்து தாலிபான்கள் எடுக்கப்போகும் அடுத்தகட்ட நடவடிக்கை சர்வதேச அளவில் பெரும் எதிர்பார்ப்பை ஏற்படுத்தியுள்ளது.