राष्ट्रवादी काँग्रेसमध्ये पुन्हा एकदा राजकीय भूकंप होण्याची शक्यता निर्माण झाली आहे. शरद पवार यांच्या गटातील काही प्रमुख नेते अजित पवार यांच्या गटात सामील होण्याच्या तयारीत असल्याची चर्चा जोरात सुरू आहे. राहुल मोटे, राहुल जगताप आणि विजय भांबळे हे तीन नेते शरद पवार यांची साथ सोडून अजित पवार यांच्या नेतृत्वाखालील गटात जाण्याची शक्यता आहे. विशेष म्हणजे, या तिन्ही नेत्यांनी नुकत्याच झालेल्या विधानसभा निवडणुकीत महायुतीच्या विरोधात निवडणूक लढवली होती. आता या नेत्यांचा अजित पवारांच्या गटात प्रवेश होणार असल्याच्या बातम्यांनी राजकीय वर्तुळात खळबळ उडाली आहे. या घडामोडी शरद पवार यांच्यासाठी मोठा धक्का ठरू शकतात, असं मानलं जात आहे.

या नेत्यांचा पक्षप्रवेश खरंच होणार का, हे पाहणं महत्त्वाचं ठरणार आहे. कारण महायुतीविरोधात लढणाऱ्या नेत्यांना अजित पवार आपल्या गटात सामावून घेणार का, हा प्रश्न उपस्थित होतोय. जर हे नेते अजित पवारांसोबत गेले, तर शरद पवारांच्या गटाची ताकद कमी होऊ शकते. दुसरीकडे, अजित पवारांना आपला गट मजबूत करण्याची संधी मिळेल. या सगळ्या घडामोडींचा परिणाम आगामी राजकीय समीकरणांवर कसा होईल, याकडे सर्वांचं लक्ष लागलं आहे. हा बदल खरोखर घडला, तर अजित पवारांनी पुन्हा एकदा काकांना मोठा धक्का दिल्याचं मानलं जाईल.